Simulizi: Ndoto Yangu, Machungu Yangu

 

Katika mtaa wa kawaida ulioko jijini Dar es Salaam, kulikuwa na msichana mmoja aliyeitwa Amina. Amina alikuwa na kipaji cha ajabu katika kuimba, na ndoto yake kubwa ilikuwa kuwa msanii maarufu wa muziki nchini Tanzania. Akiwa shuleni, alishinda mashindano mengi ya kuimba, na kila mtu alimwambia kwamba angekuwa staa siku moja.

Baada ya kumaliza shule, Amina aliamua kufuata ndoto yake kwa dhati. Alijitambulisha kwa maproducer wa studio mbalimbali, akitafuta nafasi ya kurekodi nyimbo zake. Producer wa kwanza aliyekutana naye alimwambia:

"Una kipaji, lakini unahitaji kufanya zaidi ya kuimba ili kufanikiwa."

Maneno haya yalibeba maana iliyokuwa ngumu kwake kuelewa mwanzoni, lakini baadaye aligundua kwamba hakuwa anazungumzia kazi bali masuala binafsi.

Katika harakati za kufanikisha ndoto yake, Amina alianza kukutana na wasanii wakubwa waliomwahidi msaada. Walimuita studio, wakampa matumaini ya kurekodi, lakini mara nyingi walimtumia tu kama sehemu ya kufurahisha mioyo yao. Alijikuta akitumika kwa njia nyingi bila mafanikio yoyote.

Amina alikutana pia na madirector wa video ambao walimwahidi kumpa nafasi ya kuonekana kwenye video kubwa, lakini walitaka malipo ya "ziada" ambayo hayakuhusiana na pesa. Kila mara alijikuta akiumizwa, akidanganywa, na mara nyingine kudharauliwa alipokataa kutimiza matakwa yao.

Ndoto zake ziliendelea kuzama kila alipojaribu kupanda juu. Hakuweza kuelewa kwa nini kipaji chake kilikuwa hakitoshi bila kutoa vitu vingine ambavyo havikuhusiana na muziki.

Siku moja, Amina alikaa chini na kutafakari. Aligundua kuwa hakuna mtu atakayempa nafasi kama hatasimamia ndoto zake mwenyewe. Alianza kujifunza kurekodi nyimbo zake kupitia programu za kompyuta. Alianza pia kutumia mitandao ya kijamii kupost nyimbo zake, huku akijitahidi kujijengea mashabiki wake mwenyewe.

Ingawa ilikuwa ngumu, alikataa kurudi kwa watu waliomtumia vibaya. Aliweka juhudi zake zote kwenye kazi yake mwenyewe. Hatimaye, nyimbo zake zilianza kupata umaarufu mtandaoni, na watu walimtambua kwa kazi yake safi na ya kipekee.

Hadithi ya Amina ni kioo kwa wasichana na wanawake wenye ndoto za kufanikiwa katika muziki au sekta nyingine yoyote. Anawaonyesha kwamba ingawa changamoto ni nyingi, na watu wenye nia mbaya ni wengi, kujisimamia na kutokata tamaa kunaweza kuwa njia ya mafanikio halisi.

Leo, Amina anazunguka shule na vyuo vikuu akihamasisha wasichana wengine kuamini ndoto zao bila kuruhusu yeyote kuwavunja moyo au kuwatumia vibaya. "Usiruhusu mtu yeyote akuambie huwezi," ndivyo anavyosema kila mara.

Kwa wanawake wote wenye ndoto kubwa: Simba wa kike hashindwi! Endelea kupambana!

Imeandikwa na MZIKI DL.